المميزات الي ماشفتها بقوقل
- يعلمني بالسواهر ويحدد لو هي ساهر سرعة او حزام امان وجاب لي معظمها
- يعرف الشارع وش سرعته وكل ماتغيرت سرعة الشارع تتغير بالتطبيق بعد
- يحذرني ويعلمني بالمطبات
- مظهره شكله اجمل ويتوافق مع شاشة السيارة
السلبيات
- لو بتبحث عن اي فندق او مطعم او محطة بتعاني حرفيا وبيضيع فيك للحين اي بحث عن حاجة خارج المناطق بتعاني لو ماتعرف وين موقعها
- صح انه يعلمك بالمطبات والسواهر والسرعة حقت الشارع إلا إن معلوماته ماهي ثقة ولاحظت فوق 5 اغلاط بالطريق هذا
هي تعتبر 90% صحيحة بس باقي لازم تعتمد عالشارع
- مافيه توافق حقيقي بين البلديات والتطبيق، قوقل بديهي انه مايستوعب الطرق الجديدة ويتأخر لأنه شركة عالمية، اما هذولا وش عذرهم بالضبط؟ وروطني مع طريق قديم خلاني ازيد 20 كيلو (يعني ثلث ساعة زيادة) بسبب ان اللفة الي يبونها مسكرة
- نظام البلاغات عن ساهر وغيرها فعلا يخبرني وفيه ناس يبلغون عن سواهر ماجابها التطبيق ويعلمني ان فيه 9 او 10 بلاغات بس بعد ما اتجاوز المكان مايطلعلي اقتراح او حاجة بالشاشة عشان أأكد على البلاغ ولا لا، لازم بشكل يدوي وأطول، وهالحاجة ماتناسب سواقة سيارة
- الأداء الصوتي سيء مرة، ومستعملين ذكاء اصطناعي، وفيه 5 اصوات كلهم مدموج فيهم ذكاء اصطناعي وكلهم سيئين مرة
باختصار فيه مقومات كبيرة وفرق كبير عن التجربة السابقة بكثير، واتوقعهم بيتطورون بشكل اكبر وأظنني بعتمده جزئيا على الأقل ومستعد اني استعمله بالطرق الي حافظها عشان لو صارت مشاكل أو أخطاء ابلغهم.
