r/saudisinshape • u/Amazing_Advance1172 • 23h ago
SmallThingsThatMatter المكملات اللي تحتاجها بدون فلسفة!
١. سيد الكل كرياتين صيغة مونوهايدريت
كلام يصدع بس ركز فيه شوي واترك التعفن الدماغي على جمب:
بالتمرين راح تستهلك عملة الطاقة بجسمك (ATP)، فتصير ADP
المهم ان الـADP تناشد تبي فوسفات تنشبك معها، والذيبان الكرياتين يسويها، فتصير ATP (اتوقع كذا عرفنا علميا ليه تعطينا طاقة في التمرين)
+ تخزن مويه جوا العضل، فتحس ان عضلاتك منتفخه شوي 😎
وله امور كثيره ثانيه مو بس في النطاق الرياضي، الكرياتين ياجماعه يحسن عندك الادراك العقلي والذاكرة، والبحوث اثبتت هالشي.
لكن اذا عندك مشاكل في الكلى لاتاخذه الا لما تستشير طبيب.
ولا ننسى نكثر مويه لما نستخدمه، وافضل مؤشر هو لون البول اجلك الله، الدوز يوميا 5g وريح راسك، من اللي يقولك زد الجزعة بعدين نقص، خساير ونفس النتيجة 😂
٢. الاوميقا ٣ حبيب الكل
عباره عن توأم EPA و DHA، وشوية زيوت، لما تشتري المنتج دور شي فيه التوأم رقمهم عالي فيه، اللي عندي مثلا EPA 600mg, DHA 300mg،
زي الفل، والدوز اليومي اخذ حبتين ( ٣ قرام تقريبا كمجموع )
كفايده اختصرلك انه مفيد ينقص الدهون الثلاثيه بالدم، يفيد عضلاتك، يفيدك بالاستشفاء، مفاصلك، الزبده ملك.
٣. الزنك picolinate or glycinate
التيست يحبيبي التيست، يزبطه لك ويهندمه والتست علاقته طرديه مع العضلات والاستشفاء، اذا هو مزبوط عضلاتك مزبوطه، ١٥-٣٠ مق باليوم.
طبعا مايعني ان البنات ماياخذونه، بالعكس مفيد جدًا للمناعة والجلد، ويخفف من التقلصات وقت الدورة.
النقطة المهمة هو انه ثقيل ع البطن عند البعض، خذه بعد الاكل او خذ صيغة glycinate اخف ع المعده.
٤. ماقنيسيوم glycinate
تعرف النومه ذيك اللي تجي مره ولا مرتين بالسنة وتقوم منها تحب الدنيا وتحس بنشاط وسعادة؟، تقريبًا هذا بيكون عضيدك وبيكررها لك.
الدوز 200mg، يزبط نومة، يرخي عضلاتك، يعني استشفاء افضل.
اهم نقطة من القربعة ذي كلها هي متى تاخذهم باليوم؟
كرياتين: اي وقت يحبيبي.
اوميقا: خذها بعد وجبة فيها كمية دهون حليوه.
زنك: خذها مع الوجبات عشان ماتحس بقروشة ببطنك.
ماقنيسيوم: قبل النوم بساعة.
ولاتقروش عمرك بأي هبده تسمعها، واللي عنده سؤال حياه، واللي عندك اضافة او معلومه لايحرمنا منها 🙏
